A SA FESTA

Allicchideisì a sa lestra
ca sa Rilìchia est partendu
sa cavalleria po prima est passendu
e' Santu Sisinni, ca est sa mellu festa.

A innantisi a innantisi c'e' s'arroderi
ca faidi partì u' guettu ogna tantu
po avvisai sa genti che passendu su Santu
e strintu bei e' in sa mai de su predi.

D'accompangiada finzas a Lacueddas
sa brufassoi a sa cunfaria
medas a pei sighinti sa ia
a sou de sonettu e de launeddas.

S'imbatidi a sa cresia dopu Basseba e Nati
is cuaddus sudaus senza de fuetus
in mesu de su pruì e fumu de is guettus
de vernàcia e nuxedda ai fainti sa pati.

In mesu de is ollastus ca fainti umbra callada
c'est sa cresia a craru de Montecrabas
a biu annada bellas e annadas mabas
antiga costruzioi chi depid'essi salvada.

Sa festa manna de mannus e pipius
mesa de turrois, cìxiri e trumbitas
e chi tei dinai incingia' crapitas
bistiri bellus, e s'aderètzada is pius.

Petza de proceddu e biu in abundanza
ballus e mutetus non mancanta mai
srìndia e carapigna po si ranfriscai
po onori de su Santu o po rispetai s'usanza.

Tradizioi chi su cidresu si ddu pigad a coru
ma sa Santa strutura est in malu stadu
u' tempiu chi veneraus de bonu gradu
salveus a su prus prestu custu desoru.

Eus fatu bona festa pitius e mannus
narat su diciu "pira cotta pira crua
bandidi tranquillu dognunu in domu sua"
e auguru a totus a medisimus annus.

Giovanni Piras 3 agosto 1990